ACTIVIDADES DE DIVULGACIÓN NO IES "BREAMO"

Este ano repetimos a experiencia do pasado ano consistente en realizar unhas actividades de divulgación cos alumnos de 1º de bacharelato do Instituto de Ensinaza Secundaria Breamo de Pontedeume, dentro da materia de Antropoloxía que imparte o profesor Víctor Mateo.

Secuenciamos a actividades en dous días. O luns 6 de maio adicamos a sesión lectiva da materia a amosar aos rapaces algúns restos de tégula, latericio, cerámica, doas e algún resto metálico dos atopados na intervención arqueolóxica de A Ínsua de setembro de 2011. Seguidamente proxectamos unha presentación especialmente deseñada para eles na que procuramos dar a coñecer de maneira didáctica os bens do Patrimonio Arqueolóxico do litoral de pontedeume e Miño, afondando na importancia de conservalo e de mantelo e dando conta da lexislación existente de protección do Patrimonio.

O segundo día foi o luns 13 de maio, e a actividade consistiu nunha excursión guiada con saída de Pontedeume ás 9:30 en autobús cara ao cumio do monte de Breamo que, transcorridos cinco días da romaría de San Miguel, atopámola ateigada de lixo, nun estado absolutamente impresentable que amosaba ás claras a desidia e desinterese que polo Patrimonio teñen os responsabeis obrigados a protexelo.

Diante da ermida de San Miguel comentamos as características do lugar como santuario precristián, as implicacións antropolóxicas en relación á manifestación do sagrado alí e as consecuencias sociolóxicas que a día de hoxe pódense ler no folclore que arrodea as festas e as lendas de Breamo.

Seguidamente iniciamos a baixada a pé cara ao castro de Castrelo, entre as parroquias de Centroña (Pontedeume) e Perbes (Miño), onde os rapaces poideron coñecer un dos bens patrimoniais de tipo arqueolóxico máis sobranceiros de todo o territorio ártabro, malia estar inzado de maleza e eucalipto. A estruturas defensivas do castro e a súa ubicación deixaron impresionados, sen dubida, aos rapaces e as rapazas .

Despois continuamos a baixada do monte por Sambollo e Boebre ata chegar á punta Carboeira, ao castro de A Ínsua, onde rematamos o percorrido cun rápido relato das circunstancias que nos levaron a iniciar a intervención arqueolóxica naquel xacemento e das cousas que atopamos e recuperamos para disfrute de todos os eumeses. O autobús esperábanos a carón do local social de Boebre para levarnos de volta ao Instituto de Pontedeume.